मोघेंच्या धनादेश वाटपाला मनसेचे प्रत्युत्तर

             ग्रामपंचायत स्तरावर धनादेश वाटप

स्थानिक पातळीवरील पदाधिका-यांचा हक्क डावलुन शासकीय मदतीचे धनादेश स्वहस्तेच वाटप करण्याचा अट्टाहास करणा-या सामाजीक न्याय मंत्री शिवाजीराव मोघे व त्यांच्या निकटस्थ जि.प.सदस्याला महाराष्ट्र नवनिर्माण सेनेने ‘म.न.से.’ स्टाईलनेच प्रत्युत्तर दिले आहे. नुकतेच बेलोरा येथे पाणी टंचाई आढावा बैठकीचे आयोजन करण्यात आले होते. या बैठकीत घरकुल लाभार्थ्यांना धनादेशाचे वाटप करण्यासाठी पंचायत समिती अधिका-यांवर दबाव टाकण्यात आला. ही बाब लक्षात येताच महाराष्ट्र नवनिर्माण सेनेचे जिल्हा उपाध्यक्ष प्रशांत धांदे यांनी गावपातळीवरील धनादेश वाटपाचा हक्क स्थानिक सरपंचाला असला पाहिजे याकरीता ३ ग्रामपंचायती मधील घरकुल लाभार्थ्यांचे धनादेश घेऊन वासरी, मुरली व चोरांबा येथे ग्रा.पं.सरपंचांच्या हस्ते लाभार्थ्यांना वाटप करण्यात आले.

महादेव सुरपाम, तुळशीराम आत्राम, किसन आत्राम, शंकर मेश्राम, दौलत सुरपाम, पुंडलीक गराटे, बेबी मंगाम, लक्ष्मण दंडाजे, श्रावण बारेकर, सुरेश आत्राम, बाजीराव सुरपाम, माणिक आत्राम, गोविंदा मेश्राम, गणेश पेंदोर या लाभार्थ्यांना सरपंचांच्या हस्ते धनादेश वाटप करण्यात आले. यावेळी वासरीच्या सरपंच प्रियंका प्रशांत धांदे, मनसेचे जिल्हा उपाध्यक्ष प्रशांत धांदे ग्रा.पं.सदस्य भोपीदास राठोड, शंकर मादाडे तसेच विठ्ठल गोवारदिपे, प्रदिप राजुरकर, तुळशीराम निबुधे, किसन राजुरकर, भाऊराव धांदे, वासुदेव गुरनुले, प्रभाकर वानखडे, रविंद्र कोडापे, मनसेचे पंकज राठोड, प्रशांत अवचित, अनिल जाधव, जगन्नाथ चौधरी, रविंद्र चव्हाण उपस्थित होते.
सामाजीक न्याय मंत्र्यानी आपल्या पदाची प्रतिष्ठा लक्षात घेता प्रत्येक धनादेश आपल्याच हस्ते वाटप व्हावा असा अट्टाहास न धरता स्थानिक पदाधिका-यांना त्यांचा मान मिळु द्यावा. तसेच शासकीय मदत आपल्यामुळेच आली असा बनाव निर्माण करून लोकांना संभ्रमात टाकु नये असे आवाहन मनसेचे जिल्हा उपाध्यक्ष प्रशांत धांदे यांनी केले आहे. पंचायत समितीच्या अधिका-यांनी राजकीय दबावातुन अशा प्रकारांना संमती दिल्यास यापुढे तिव्र आंदोलन छेडण्यात येईल असा इशाराही त्यांनी दिला आहे.
साभार:- देशोन्नती