भावापाठोपाठ आईनेही दिली तिला किडनी दान

घाटंजीतील कटकमवार परिवार जोपासतोय जिव्हाळ्याची अनोखी परंपरा

रक्ताच्या नात्यातील जिव्हाळा कधीही न तुटणारा आहे. या नात्यात कितीही मतभेद असले तरी प्रसंगी आपल्या माणसाप्रती ओढ वाटतेच. आजच्या युगात रक्ताची नातीही परक्यापेक्षा वाईट वागत असल्याची अनेक उदाहरणे असली तरी आपल्या जीवाभावाच्या माणसासाठी आपल्या शरीराचा एक भाग दान करणारे सुद्धा या समाजातच आहेत. जग कितीही स्वार्थी झाले तरीही हक्काच्या नात्याची नाळ अजुनही जुळलेलीच आहे. खापरी (घाटंजी) येथिल कटकमवार परिवाराने आपल्या कृतीतून समाजापुढे एक अनुकरणीय आदर्श ठेवला आहे. येथिल व्यावसायीक अभय कटकमवार यांच्या मातोश्री हिराबाई ब्रम्हानंद कटकमवार यांनी त्यांची मुलगी अश्विनी अनिल बेलगमवार रा. आर्णी हिला किडनी दान केली. अश्विनी ही गेल्या ११ वर्षांपासुन किडनीच्या आजाराने ग्रस्त आहे. १० वर्षापुर्वी तिचे बंधु अभय कटकमवार यांनी तिला एक किडनी दान केली होती. पुन्हा किडनी खराब झाल्यामुळे आईने आपल्याच शरीराचा भाग असलेल्या लेकीसाठी किडनी दान दिली. हिराबाई ५८ वर्षांच्या आहेत. या वयातही अवघड शस्त्रक्रीयेला सामोरे जाऊन त्यांनी मातृत्वात असलेल्या अजोड जिव्हाळ्याचा परिचय दिला. 

काही महिन्यांपुर्वी हैदराबाद येथिल महाविर हॉस्पीटल मध्ये किडनी प्रत्यारोपणाची शस्त्रक्रिया करण्यात आली.

नुकत्याच कृषी भवन घाटंजी येथे झालेल्या एका कौटुंबीक कार्यक्रमात सहयोग नागरी सहकारी पतसंस्था व अभय कटकमवार मित्र परिवाराच्या वतीने हिराबाई कटकमवार यांचा 

सन्मान करण्यात आला. या भावनिक सोहळ्यात सहयोग पतसंस्थेचे विनोद गवळी, रविंद्र उमाटे, उत्तम कोवे, मोहन ढवळे, विशाल साबापुरे, तसेच अनिता सुधीर बोरगावकर, सखाराम निलावार, माला अवधुत बिजमवार, शितल अभय कटकमवार, विनोद गुज्जलवार, संस्कृती कटकमवार यांच्यासह मित्रपरिवाराची उपस्थिती होती.

साभार :- देशोन्नती