दोन तिन वर्षांपुर्वी गॅस सिलेंडर वितरणात पारदर्शकता आणण्यासाठी ऑनलाईन बुकींग करण्याची सुविधा अंमलात आली. मोबाईलद्वारे फोन करून बुकींग करणे सक्तीचे केल्या गेले. त्यानंतर घरपोच गॅस पोहचविण्यात येत होता. आता मात्र या सेवेचा पार बोजवारा उडाला असुन ही सेवा ऑनलाईन वरून लांबलाईन झाल्याची प्रतिक्रीया घाटंजी शहरात व्यक्त होत आहे. गेल्या काही महिन्यांपासुन घाटंजी शहरात गॅस सिलेंडरचे घरपोच वितरण अनियमीतपणे होत आहे. काही ठरावीक भागातच गॅस घरपोच जातो. या आठवड्यात तर ऑनलाईन बुकींगच बंद झाली असे लखमाई ईण्डेन या गॅस वितरकाकडून सांगण्यात आले. त्यामुळे ग्राहकांमध्ये संभ्रमाचे वातावरण निर्माण झाले आहे. महिन्याभरापुर्वी ऑनलाईन बुकींग केलेल्या ग्राहकांनाही सिलेंडर मिळेनासे झाले. त्यामूळे अनेकांनी थेट गॅस वितरकाच्या गोडाऊनपुढेच सिलेंडरसह ठाण मांडणे सुरू केले. आता तर अनेकदा गॅस सिलेंडरची ही रांग तब्बल १ ते २ किलोमीटर पर्यंत पसरलेली असते. पहाटे ६ वाजतापासुनच ग्राहक येथे आपला नंबर लावुन बसतात. सुमारे ६ ते ७ तास वाट पाहिल्यावर त्यांना सिलेंडर मिळते. कधी तर ग्राहकांची संख्या जास्त असल्यावर पुरेसे सिलेंडर उपलब्ध नसल्याने तासंतास वाट पाहुनही आल्या पावली परत जावे लागते. तिन चार दिवसांपुर्वी तर लखमाई ईण्डेनच्या अंजी रोडवरील गोदामावर सुमारे ८०० ते ९०० ग्राहकांची रांग सकाळपासुन लागलेली होती. मात्र गॅसच्या गाडीमध्ये केवळ ३०० सिलेंडरच आले. त्यामुळे ईतर ग्राहकांना परत जावे लागले. एकीकडे ग्राहकाना सिलेंडर मिळणे दुरापास्त झाले असतांना काळ्या बाजारात मात्र गॅस सिलेंडरचा मागणी तेवढा पुरवठा सुरू आहे. ज्या ग्राहकांनी वर्षातून केवळ चार ते पाच सिलेंडरची उचल केली आहे. त्यांच्या नावे त्यापेक्षा कितीतरी अधिक सिलेंडरची नोंद आहे. महसुल प्रशासन, पुरवठा निरिक्षक व तहसिलदार गेल्या अनेक महिन्यांपासुन सुरू असलेल्या या प्रकाराकडे जाणीवपुर्वक डोळेझाक करीत आहे. घाटंजी महसुल प्रशासनाने कधी घरगुती सिलेंडरच्या व्यावसायीक वापरावर कार्यवाही केल्याचे ऐकीवात नाही. अधिका-यांच्या या चुप्पीचे नेमके काय कारण आहे हे सर्वानांच माहित आहे.
लखमाई ईण्डेनच्या मनमानीपणामुळे ऑनलाईन गॅस बुकींग नाममात्रच ठरली असुन ग्राहकांची प्रचंड गैरसोय होत आहे.
अमोल राऊतसाभार :- देशोन्नती
No comments:
Post a Comment