शिंगे रंगविली, बाशिंगे बांधली
चढविल्या झुली, ऐनेदार
राजा परधान्या, रतन दिवाण
वजीर पठाण, तुस्त मस्त
वाजंत्री वाजती, लेझिम खेळती
मिरवीत नेती, बैलाला गे
दुल दुलतात, कुणाची वशींडे
काही बांड खोंडे, अवखळ
कुणाच्या शिंगाना, बांधियले गोंडे
पिवळे तांबडे, शोभिवंत
वाजती गळ्यात, घुंगरांच्या माळा
सण बैल पोळा, ऐसा चाले
जरी मिरवीती, परि धन्या हाती
वेसणी असती, घट्ट पट्टा
झुलीच्या खालती, काय नसतील
आसूडांचे वळ, उठलेले
आणि फुटतील, उद्याही कडाड
ऐसेच आसूड, पाठीवर
सण एक दिन, बाकी वर्षभर
ओझे मर मर, ओढायाचे.
छायाचित्र :- मिलिंद लोहकरे, रवि कहाळे, घाटंजी
No comments:
Post a Comment