चिमुकलीला पळविण्याच्या बेतात असलेल्या तरूणीस अटक

भरवस्तीतील घटनेने घाटंजीत खळबळ

शेकडो लोकांनी केला तरूणीचा पाठलाग

पाच वर्षांच्या चिमुकलीस पळवुन नेण्याच्या प्रयत्नात असलेल्या तरूणीला नागरिकांनी शिताफिने पकडून पोलीसांच्या स्वाधीन केले. घाटंजीतील नेहरूनगर भागात सकाळी ११ वाजताच्या सुमारास घडलेल्या या घटनेमुळे शहरात प्रचंड खळबळ उडाली आहे. 

अश्विनी विठ्ठल गायकवाड (२३) रा.मांडवा ता.घाटंजी असे अटक करण्यात आलेल्या तरूणीचे नाव आहे. आज सकाळी ११ वाजेदरम्यान नेहरूनगर भागातील सुमारे पाच वर्षांची चिमुकली घरी न आढळल्याने तिच्या कुटूंबीयांनी परिसरात शोधाशोध सुरू केली. तेवढ्यात मुलीच्या आजीला ती एका अनोळखी तरूणीजवळ दिसली. म्हातारी आपल्याकडे येत असल्याचे दिसताच सदर तरूणीने मुलीला घेऊन तिथुन पळ काढण्याचा प्रयत्न केला. मात्र त्या वृद्धेने तरूणीचा पाठलाग करून तिला गाठले. मुलगी बेपत्ता असल्याची वार्ता परिसरात वा-यासारखी पसरल्याने अनेक नागरिक घराबाहेर आले होते. त्यामुळे शेकडो लोकांच्या जमावाने त्या तरूणीस घेरले व तिच्या तावडीतून चिमुकलीची सुटका केली. यावेळी जमाव संतप्त झाला होता.  त्यानंतर पोलीसांना सुचना देण्यात आली. घाटंजी पोलीसांनी सदर तरूणीस ताब्यात घेऊन तिला ‘मायापाखर’ सुधारगृहात रवाना केल्याची माहिती आहे. ही तरूणी गुन्हेगारी प्रवृत्तीची असुन यापुर्वीही तिला काही ठिकाणी चोरी करतांना नागरीकांनी पकडून दिल्याचे यावेळी काही नागरिकांनी सांगीतले.

पोलीसांनी या प्रकरणात कसुन चौकशी करून यामागे मुले पळविणारी टोळी तर नाही ना याबाबत तपास करावा अशी मागणी होत आहे.


कुलरचा शॉक लागुन नवविवाहितेचा मृत्यू

तालुक्यातील पांढुर्णा (बु.) येथे दिपाली नितिन देठे (२३) या नवविवाहीतेचा कुलरचा शॉक लागल्याने दुर्दैवी मृत्यू झाला. आज सकाळी १०.३० वाजेदरम्यान ही घटना घडली. विजेचा झटका लागल्यावर उपचारासाठी यवतमाळ येथे नेतेवेळी रस्त्यातच तिची प्राणज्योत मालवली. सुमारे एक महिन्यापुर्वीच दिपाली हिचे गावातीलच नितिन देठे याचेशी लग्न झाले होते. या घटनेमुळे तालुक्यात सर्वत्र हळहळ व्यक्त होत आहे.

साभार :- देशोन्नती 

घाटंजीत गॅस सिलेंडर लिकेजमुळे घराला भिषण आग

घरातील साहित्य भस्मसात

३ लाख ५० हजारांचे नुकसान

स्थानिक आनंदनगर भागात वसंत वडतकर यांचे घरी गॅस सिलेंडर लिकेजमुळे लागलेल्या आगीत घरातील संपुर्ण साहित्य जळाले. आज सकाळी ११ वाजेदरम्यान ही घटना घडली. यामध्ये सुमारे ३ लाख ५० हजार रूपयांचे नुकसान झाल्याचा अंदाज आहे. सुदैवाने या घटनेत कोणतीही जीवीतहानी झाली नाही. 

श्री गजानन महाराज मंदिराच्या मागे असलेल्या आनंदनगरात वसंत नारायण वडतकर यांच्या घराच्या पहिल्या मजल्यावर राम बापुराव करपते हे भाड्याने राहतात. सकाळी ११ वाजताच्या सुमारास ते देवघरात दिवा लावण्यास गेले. सिलेंडर लिक असल्यामुळे गॅस घरात पसरलेला होता. ही बाब त्यांच्या लक्षात आली नाही. माचीस पेटवताच अचानक मोठा भडका झाला. राम करपते यांनी आग लागलेला सिलींडर घराबाहेर नेण्याचा प्रयत्न केला. मात्र त्यादरम्यान घरातील साहित्याने पेट घेतला. टि.व्ही, सोफा, फ्रीज, कुलर, पलंग यासह दरवाजे, खिडक्या जळुन खाक झाले. आजुबाजूच्या नागरीकांनी धावपळ करून आग विझविण्यासाठी आटोकाट प्रयत्न केले. मात्र तोवर घरातील बहुतेक सर्व साहित्य आगीच्या भक्ष्यस्थानी पडले होते. घटनेच्या वेळी घरात राम करपते यांची पत्नी प्रतिभा, २ वर्षांचा चिमुकला दिपेश हे होते. मात्र सुदैवाने कोणीही जखमी झाले नाही. आगीच्या तिव्रतेने खिडक्यांची तावदाने फुटली. नागरीकांनी वेळीच आग विझविल्याने पुढील अनर्थ टळला. सिलींडरचा स्फोट झाला असता तर मोठ्या प्रमाणावर हानी झाली असती. महसुल विभागाचे एस.वाय गुघाणे यांनी घटनास्थळाची पाहणी केली. करपते दाम्पत्याचे तिन वर्षांपुर्वीच लग्न झाले असुन दोन वर्षांपासुन ते वडतकर यांचे घरी भाड्याने राहात आहेत. गॅस कंपन्यांकडून देण्यात येत असलेले अनेक रेग्युलेटर तकलादु असल्याने काही दिवसांनी त्यातून कमी अधिक प्रमाणात गॅस लिक होत असल्याच्या तक्रारी आहेत.

साभार :- देशोन्नती 

धरणविरोधी संघर्ष समितीने बंद पाडले निम्न पैनगंगा प्रकल्पाचे काम

निम्न पैनगंगा प्रकल्पाचे (चिमटा धरण) काम  धरणविरोधी संघर्ष समितीने बंद पाडले.  आमदार संजय राठोड यांच्या नेतृत्वात समितीने हा पवित्रा घेतला. 

विदर्भ-मराठवाड्याच्या सीमेवरील पैनगंगा नदीवर चिमटा धरणाचे काम हाती घेण्यात आले आहे. दि. ७ मे २०१२ रोजी दिग्रस मतदार संघाचे आमदार संजय राठोड यांनी धरण विरोधी समितीसह निम्न पैनगंगा  प्रकल्पाच्या ठिकाणी जाऊन कामाची प्रत्यक्ष पाहणी करून उप अभियंता राजपाल वाणी यांचे कडून सदर प्रकल्पाचे काम बंद करण्याचे लेखी आश्वासन घेतले.

सातबारा खोडताड करणे, बंजर जमिन ओलीताची दाखविणे यासह खोटे कागदपत्रे दाखल करून करोडो रूपयांचा भ्रष्टाचार झाल्याच्या बातम्या दै.देशोन्नती मध्ये प्रसिद्ध झाल्यावरून आमदार संजय राठोड आणी धरणविरोधी समितीने हा मुद्दा उचलुन धरला आणी दि. ७ मे रोजी प्रकल्पाच्या ठिकाणी शेकडो बुडीत क्षेत्रातील शेतक-यांसह भर उन्हात दुपारी अडीच वाजताच्या दरम्यान दाखल झाले. यावेळी पोलीसांच्या गराड्याने प्रकल्पाच्या आवारात संबंधीतांना जाण्यास मज्जाव केला. त्यांचे म्हणणे ऐकुन घेण्याकरीता शिष्टमंडळास जाण्याची परवानगी दिली. तब्बल तासभर झालेल्या चर्चेदरम्यान उप अभियंता राजपाल वाणी हे पाऊण तास अबोल राहिले. शेवटी एक तासाच्या चर्चेनंतर सदर काम बंद करण्याचे लेखी आश्वासन त्यांनी शिष्टमंडळास दिले.

यावेळी माजी आमदार विश्वास नांदेकर, श्रीकांत मुनगिनवार, जि.प.सभापती मनमोहनसिंग चव्हाण, माजी न.प.अध्यक्ष रविंद्र अरगडे, शहर प्रमुख दिनेश मेहेंद्रे, न.प.सदस्य बापु देशमुख यांचेसह धरण विरोधी समितीचे प्रल्हाद पाटील जगताप, मुबारक तंवर, गावंडे सर व सर्व सदस्य उपस्थित होते. तसेच किनवटचे तहसिलदार अविनाश कांबळे, उपविभागीय पोलीस अधिकारी लोखंडे यांचीही यावेळी उपस्थिती होती.

साभार :- देशोन्नती 


छायाचित्र :- कैलास कोरवते, निलेश जुनगरे

बैलबाजार मैदानातील कच-यांच्या ढिगा-यांना आग

गुरूदेव वार्ड थोडक्यात बचावला 

बाजार समितीचा दुर्लक्षीतपणा

कृषी उत्पन्न बाजार समितीच्या वतीने ज्या मैदानात बैलबाजार भरविण्यात येतो तिथे असलेल्या कचरा व खताच्या ढिगा-यांना आज दुपारी आग लागली. दुपारच्या सुमारास सोसाट्याचा वारा असल्याने मैदानात ठिकठिकाणी साठवुन असलेल्या ढिगांनी पेट घेतला. झपाट्याने पसरत चाललेली आग बाजुलाच असलेल्या गुरूदेव वार्डातही पसरण्याची भिती निर्माण झाल्याने येथिल नागरीकांनी तातडीने आग विझविण्यासाठी प्रयत्न केले. नगर परिषदेचा टँकर बोलविण्यात आला. वार्डातील नागरीकांनी वेळीच धावपळ केल्याने आग लवकर आटोक्यात आली. अन्यथा दुपारी असलेल्या सुसाट वा-यामुळे लोकवस्तीपासुन अवघ्या २० ते २५ फुट अंतरावर असलेल्या या कच-याच्या जळत्या ढिगा-यांनी संपुर्ण गुरूदेव वार्डालाच आगीच्या भक्ष्यस्थानी घेतले असते. कृषी उत्पन्न बाजार समितीने तातडीने हे कच-याचे ढिगारे न उचलल्यास तिव्र आंदोलन करण्याचा ईशारा येथिल संतप्त नागरीकांनी दिला आहे. घाटी (घाटंजी) भागातील गुरूदेव वार्डाच्या बाजुला बाजार समितीच्यावतीने बैलबाजार भरविण्यात येतो. यादरम्यान येथे जमा होणा-या शेण, कचरा व वैरणीच्या खताचा लिलाव केल्या जातो. हे जमा झालेले खत व कचरा संबंधीत कंत्राटदाराने मैदानातून न्यावयास पाहिजे होता. मात्र त्याच्या अक्षम्य दुर्लक्षीतपणामुळे आजुबाजूच्या परिसराला धोका निर्माण झाला आहे. बैलबाजारानंतर बाजार समितीने साफसफाई न केल्याने सर्वत्र वैरणाचा कचरा पसरला आहे. एका ठिणगीनेही या भागात भिषण आग पसरण्याची भिती आहे. दोन दिवसांपुर्वी येथिल दोन कच-याच्या ढिगा-यांनी पेट घेतला होता. त्यावेळी एक मुलगा जळता जळता सुदैवाने वाचला.

आज दुपारीही दोन ढिगा-यांना आग लागली. वारा सुसाट असल्याने विस्तव सर्वत्र उडाला. त्यामुळे सुमारे आठ ते दहा ठिकाणी आग लागली. या मैदानात असलेल्या बाजार समितीच्या शेड मध्ये गवताच्या पेंढ्या ठेवुन आहेत. वारा विरूद्ध बाजुने असता तर प्रचंड नुकसान झाले असते. या आगीबाबत माहिती देण्यासाठी काही नागरीकांनी बाजार समितीचे सभापती अभिषेक ठाकरे यांना मोबाईलवर संपर्क केला असता त्यांनी फोन उचलला नाही असे नागरिकांनी सांगीतले. या प्रकारामुळे नागरिक संतप्त झाले होते. आग विझविण्यासाठी विनोद मोहिजे, मंगल मोहिजे, अभय मोहिजे, विठ्ठल ससाणे, अंकुश ठाकरे यांचेसह अनेकांनी प्रयत्न केले. येथे भरविण्यात येत असलेल्या बैलबाजाराचा परिसरातील नागरीकांना नेहमीच त्रास होतो. त्यामुळे बैलबाजाराचे ठिकाण बदलावे किंवा संरक्षक भिंत बांधावी अशी येथिल नागरिकांची मागणी आहे.
साभार :- देशोन्नती 

पाणी टंचाई निवारणासाठी प्रशासनाने सजग राहावे - ना.शिवाजीराव मोघे

पिण्याच्या पाण्याचे महत्व लक्षात घेता जिल्हा, तालुका प्रशासन तसेच पाणी समस्येशी थेट संबंध येणारे ग्रामपंचायतीचे सरपंच व सचिवांनी सजग राहुन काम करावे. प्रत्येक नागरिकाला स्वच्छ व मुबलक पाणी उपलब्ध व्हावे यासाठी आवश्यक ते सर्व प्रयत्न करण्यात यावे असे आदेश राज्याचे सामाजीक न्याय मंत्री ना.शिवाजीराव मोघे यांनी दिले. स्थानिक संत मारोती महाराज सांस्कृतीक भवनात आयोजीत पाणी टंचाई आढावा बैठकीत ते अध्यक्षपदावरून बोलत होते. यावेळी व्यासपीठावर तालुका समन्वय समितीचे अध्यक्ष ईकलाख खान पटेल, जि.प.सदस्य योगेश देशमुख, देवानंद पवार, पं.स.सभापती शैलेश इंगोले, उपसभापती सुवर्णा निकोडे, उपविभागीय अधिकारी एस.व्ही.खांदवे, तहसिलदार संतोष शिंदे, गटविकास अधिकारी रामचंद्र गेडाम यांची प्रमुख उपस्थिती होती.

भारत निर्माण योजनेंतर्गत झालेल्या गैरप्रकारासंदर्भात यवतमाळ येथे विशेष बैठक बोलविण्याचे आश्वासन मोघे यांनी तक्रारकर्त्यांना दिले. पाणी टंचाई समस्या सोडविण्यासाठी कायमस्वरूपी उपाययोजना करण्यावर प्रामुख्याने लक्ष देण्याच्या सुचनाही त्यांनी यावेळी दिल्या. तालुक्यातील विवीध ग्रामपंचायतींचे सरपंच, उपसरपंच व ग्रामसचिवांनी पाणी टंचाई संदर्भात आपल्या अडचणी मंत्री महोदयांसमोर व्यक्त केल्या. पाणी टंचाईच्या तिव्रतेनुसार त्यावर तातडीने उपाययोजना करण्याच्या सुचना ना.मोघे यांनी प्रशासनाला दिल्या. अनेक ग्रामसेवक पाणी टंचाई संदर्भात प्रस्ताव सादर करीत नसल्याची समस्याही यावेळी मांडण्यात आली. प्रा.डॉ.प्रदिप राऊत यांनी आढावा बैठकीत पाणी टंचाई बरोबरच तालुक्यातील फ्लोराईडयुक्त पाणी व जलपुनर्भरणाचाही अग्रक्रमाने विचार व्हावा अशी मागणी केली. घाटंजी, आर्णी व पांढरकवडा तालुक्यातील अनुक्रमे २५, ४५, ३० अशी एकुण १०० गावे फ्लोराईडच्या विळख्यात असुन या परिसरातील हजारो नागरीक फ्लोरोसिस या आजाराने ग्रस्त आहेत. त्यामुळे यासाठी कायमस्वरूपी उपाययोजना करण्यात यावी अशी आग्रही मागणी प्रा.डॉ.राऊत यांनी ना.मोघेंना दिलेल्या निवेदनातून केली.

विरूळ, मांडवा, मारेगाव येथिल पाणी समस्या यावेळी मांडण्यात आली. रत्नापुर येथे पाईपलाईन, माणूसधरी येथे विहिर अधिग्रहण, कोपरी खुर्द, कुर्ली यासह काही गावातील भारत निर्माण योजनेच्या पाण्याच्या संदर्भात तक्रारी येथिल सरपंचांनी केल्या. कुर्लीचे सरपंच अयनुद्दीन सोलंकी यांनी भारत निर्माण योजनेतील गैरव्यवहाराचा प्रश्न उपस्थित केला. पाणी पुरवठा समितीच्या पदाधिका-यांनी केलेल्या भ्रष्टाचारामुळे कुर्ली येथिल नागरीक मुबलक पाण्यापासुन वंचित आहेत. प्रशासन मात्र या पदाधिका-यांना पाठीशी घालीत आहे असा आरोप त्यांनी यावेळी केला. दत्तापुर येथिल जुनी पाईपलाईन बदलविण्याची मागणी येथिल सरपंचांनी केली. मोवाडा येथे बोअरवेल, करमना येथे नळ योजना, लहान मोवाडा येथे हातपंप, पारवा येथे नळयोजनेची टाकी लिक असल्याची समस्या व विहीर अधिग्रहण, पांढुर्णा खुर्द येथे स्मशानभुमीमध्ये बोअरवेल व विहिर अधिग्रहण, सोनखास येथे टँकर द्वारे पाणी पुरवठा, २२ लाख रूपये खर्च होऊनही अपुर्ण असलेली पिंपरी येथिल भारत निर्माण योजना, यासह पंगडी, राजापेठ, पाटापांगरा, रामपुर, शिवणी, भुताई पोड, पोताई पोड, दडपापुर, साखरा खुद, सावंगी संगम, शरद, नागेझरी, भिमकुंड, सावरगाव (मंगी), तरोडा, वाढोणा (खु.) कोलाम पोड, वघारा येथिल सरपंच, उपसरपंच व सचिवांनी पाणी टंचाई संदर्भातील समस्या सांगीतल्या. कार्यक्रमाचे संचालन अरविंद झाडे तर आभार प्रदर्शन विस्तार अधिकारी योगेश उडाखे यांनी केले.

साभार :- देशोन्नती