जोगवा, लावणी, गोंडी लोकनृत्य यासह अनेक नृत्यप्रकारांनी शिवतिर्थावर उपस्थित हजारोंच्या संख्येत असलेल्या प्रेक्षकांना ठेका घ्यायला लावले. औचीत्य होते शिवजयंती निमित्य आयोजीत जिल्हास्तरीय समुहनृत्य स्पर्धेचे.
या स्पर्धेत तब्बल १६ चमुंसह ११९ स्पर्धकांनी सहभाग घेतला. वैविध्यपुर्ण गितांच्या तालावर सादर झालेल्या नृत्यांनी वातावरणात एक वेगळेच चैतन्य निर्माण झाले होते. येथिल विघ्नराज ग्रुपने मोरया मोरया हे गित सादर केले. सुशांत बाडे, ओमप्रकाश दर्शनवार यांच्या शा अॅन्ड ग्रूपने सादर केलेल्या रोबोटिक्स डान्सने प्रेक्षकांना एका वेगळ्याच दुनियेत नेले. तर दिव्या कठाणे, शिवाणी निस्ताने, समिक्षा वाकपैंजन यांच्या राधिका ग्रूपने सादर केलेल्या राधा कैसे ना जले या नृत्यातून राधा कृष्णाचे नटखट नाते दाखविण्यात आले. युगंधरा अॅन्ड ग्रुपने सादर केलेल्या लल्लाटी भंडार या नृत्यात युगंधरा मानकर हिच्या अदाकारीने सर्वांनाच खिळवुन ठेवले तसेच याच नृत्यावर जेसिस कॉलनी मधील गजानन महाराज ग्रुपनेही उत्कृष्ट नृत्य सादर केले. यामध्ये अनुश्री उपलेंचवार हिच्यासह चिमुकल्या मुलींनी आपल्या पदलालित्याने प्रेक्षकांना जिंकले. नटराज अॅन्ड निमु ग्रुपने सादर केलेल्या देवा श्री गणेशा या नृत्याला तर प्रेक्षकांनी अक्षरश: डोक्यावर घेतले. या व्यतिरिक्त लावणी ग्रुपचे उचकी (रिमिक्स) नृत्य, महालक्ष्मी ग्रुपने सादर केलेला आई भवानी तुझ्या कृपेने हा रिमिक्स गोंधळ, मैय्याराणी ग्रुप (नमो नमो), नवचैतन्य ग्रुप (श्री गणेशा देवा), नृसिंह ग्रुप (गोंधळ), सिद्धीविनायक ग्रुप (रिमिक्स), गवळण ग्रुप (गवळण), श्री गणेश ग्रुप (देश रंगीला रंगीला), श्री ग्रुप (गोंडी नृत्य) या समुहनृत्यांनी प्रेक्षकांचे मनोरंजन केले. ही स्पर्धा पाहण्यासाठी सुमारे २० हजार प्रेक्षकांची उपस्थिती होती.
या स्पर्धेत नटराज अन्ड निमु ग्रुपला प्रथम पारितोषीक देण्यात आले. या ग्रुपमध्ये नवनित ढोणे, स्वराज भगत, यश दिकुंडवार, शुभम राठोड, शुभम दुल्लरवार, विवेक सिंगणवार, विवेक गडे यांचा सहभाग होता. यवतमाळचा युगंधरा ग्रुप द्वितीय पारितोषीकाचा मानकरी ठरला. या ग्रुपमध्ये युगंधरा मानकर, चांदणी बिसमोरे, सुहासिनी देशभ्रतार, निकीता डोंगरे, अंकिता डोंगरे, अनुराधा डोंगरे यांनी सहभाग घेतला. प्रोत्साहनपर पारितोषीक विघ्नराज ग्रुपला देण्यात आले यामध्ये सचिन झाडे, रोहन त्रिपाठी, गौरव मडावी, साक्षी दिडशे, पुनम वाढई, दिक्षा बाकमवार, साक्षी वाढई हे सहभागी झाले होते.
स्पर्धेचे परिक्षण रूपेश कावलकर व आकाश कवासे यांनी केले. तर संचालन संतोष राऊत यांनी केले.स्पर्धेच्या यशस्वीतेसाठी राजे छत्रपती सामाजीक संस्था व संभाजी ब्रिगेडच्या कार्यकर्त्यांनी परिश्रम घेतले.
