यशस्वी होण्यासाठी शिवरायांसारखी धेय्यनिष्ठा ठेवा - अमितकुमार राठोड

कोणत्याही क्षेत्रात यशस्वी होण्यासाठी कार्यप्रती समर्पण आणी आवड गरजेची असते. शिवाजी महाराजांनी त्यांच्या जीवनात चांगले आदर्श डोळ्यापुढे ठेऊन कार्य केले. जर प्रत्येकाने शिवरायांसारखी धेय्यनिष्ठा ठेऊन काम केले तर यश नक्कीच मिळेल असे प्रतिपादन आय.पी.एस.अमितकुमार राठोड यांनी केले. घाटंजी येथे शिवजयंती उत्सवात वीर राजे संभाजी पुरस्कार स्विकारल्या नंतर ते सत्काराला उत्तर देत होते. कार्यक्रमाच्या अध्यक्षस्थानी राज्याचे सामाजीक न्यायमंत्री ना.शिवाजीराव मोघे होते. प्रसिद्ध वक्ते प्रा.श्याम मानव, निवासी उपजिल्हाधिकारी राजेंद्र देशमुख, नगराध्यक्ष राम खांडरे, तहसिलदार एम.एम.जोरवर, ईकलाख खान, शैलेश र्इंगोले यांची यावेळी प्रमुख उपस्थिती होती. 

युवकांना प्रेरणादायी असलेल्या भाषणात अमितकुमार राठोड पुढे म्हणाले की, शिवरायांनी भारतीय संस्कृतीला शिखरावर नेण्याचे स्वप्न पाहिले होते. त्यासाठी त्यांनी प्रयत्नांची पराकाष्ठा केली. तसेच आजच्या युवकांनीही स्वत:च्या ईच्छेचा पाठपुरावा करावा. पालकांनी मुलांना त्यांची आवड जपण्यासाठी प्रोत्साहित करावे. माणुस हा त्याच्या सहवासामुळे ओळखला जातो. त्यामुळे चांगल्या लोकांचा सहवास ठेवा असे आवाहन त्यांनी केले. अभ्यासाला दैनंदिनीचा भाग बनवुन त्याचा आनंद घेतल्यास यश मिळणे कठिण नाही असे ते म्हणाले. दरम्यान, ‘वीर राजे संभाजी पुरस्कार’ उपस्थितांच्या गर्दीमधुन वाजतगाजत व्यासपीठावर आणण्यात आला. हजारो घाटंजीकरांनी उभे राहुन हा सोहळा अनुभवला.

सामाजीक न्यायमंत्री ना.शिवाजीराव मोघे यांनी अध्यक्षीय भाषणातून अंधश्रद्धा विरोधी कायदा देशभरात लागु करण्याची गरज असल्याचे सांगितले. ते पुढे म्हणाले, शिवाजी महाराजांनी माणसांवर विश्वास ठेऊन कार्य केले. सर्वधर्मियांना संधी दिली. शिवराय लढले म्हणुन जिंकले. त्यामुळे लढायला शिका असे आवाहन त्यांनी केले. घाटंजी येथे शिवाजी महाराजांचा पुतळा उभारण्यासाठी नगर परिषदेला संपुर्ण सहकार्य करण्याचे आश्वासन त्यांनी दिले. या कार्यक्रमाच्या पुर्वी अखिल भारतीय अंधश्रद्धा निर्मुलन समितीचे संस्थापक प्रा.श्याम मानव यांचे छत्रपती शिवरायांचा वैज्ञानिक दृष्टीकोण या विषयावर व्याख्यान झाले. कार्यक्रमाचे संचालक राजेश उदार यांनी केले. कार्यक्रमाच्या यशस्वीतेसाठी दिपक महाकुलकर, प्रपुâल्ल अक्कलवार, संजय राऊत, राहुल खर्चे, अनिल मस्के, श्रीकांत पायताडे, राजु गिरी यांचेसह संभाजी ब्रिगेड व राजे छत्रपती सामाजिक संस्थेच्या सदस्यांनी परिश्रम घेतले.

साभार : सकाळ 

घाटंजी तालुक्यातील पुरग्रस्तांपुढे आता मोठ्या समस्या नाहीत - ना.शिवाजीराव मोघे

तालुक्यातील पुरग्रस्त आता आता ब-याच अंशी सावरले असुन त्यांच्यापुढे कोणतेही ‘मेजर प्रॉब्लेम्स’ नाहीत अशी माहिती राज्याचे सामाजीक न्याय मंत्री ना.शिवाजीराव मोघे यांनी पत्रपरिषदेत दिली. घाटंजी तालुक्यातील पुरग्रस्त गावांचा दौरा केल्यावर येथिल शासकीय विश्रामभवनात ते पत्रपरिषदेला संबोधीत करीत होते.

यावेळी तालुका समन्वय समितीचे अध्यक्ष ईकलाख खान पटेल, घाटंजीचे नगराध्यक्ष जगदिश पंजाबी, तहसिलदार प्रकाश राऊत यांची उपस्थिती होती. सध्याच्या परिस्थितीत पुरामुळे वाहुन गेलेल्या विजेच्या खांबांना उभारणे गरजेचे आहे. मात्र त्यासाठी आधी विज वितरण वंâपनीच्या नियमानुसार विज बिल भरावे लागेल असे ते म्हणाले. पुरामुळे झालेल्या नुकसानाचे सर्वेक्षण पुर्ण झाले असुन मदतीबाबत कॅबिनेट मध्येच निर्णय होईल त्यावर आता काहीही बोलता येणार नाही असे एका प्रश्नाला उत्तर देतांना ते म्हणाले. तालुक्यात जाहिर झालेला दुष्काळ हा ओला होता की कोरडा यावर ते म्हणाले की याबाबत आपल्याला वर्तमानपत्राच्या बातमीवरूनच माहिती मिळाली. नेमक्या कोणत्या माहितीच्या आधारे हा दुष्काळ जाहिर करण्यात आला याबद्दल अनभिज्ञ असल्याचे त्यांनी सांगितले. 

उपविभागीय कार्यालय आर्णीला होणार असल्याच्या निर्णयावर ते म्हणाले की तो निर्णय शासनाच्या नियमाला अनुसरूनच होत असुन त्यामध्ये राजकीय हस्तक्षेप नाही. घाटंजी नगर परिषदेत कॉंग्रेसच्या नेतृत्वातील सत्ता असुनही आवश्यक त्या प्रमाणात निधी उपलब्ध होत नाही यावर ते म्हणाले की नगर परिषदेने मागणी केल्यास निधीची कमतरता पडू दिल्या जाणार नाही. मात्र याबाबत नगराध्यक्ष जगदिश पंजाबी यांना छेडले असता निधीची मागणी सुरूच आहे. तडकाफडकी सर्व कामे शक्य नाहीत. साहेबांकडून गेल्या तिस वर्षात काही घडले नाही ते आता काय घडणार ? असा टोलाही त्यांनी लगावला.

यावेळी ना.मोघेंनी तालुक्यात प्रस्तावीत असलेल्या विवीध विकासकामांची माहिती दिली. त्यामध्ये निवासी शाळा, मोवाडा आश्रमशाळेचे जांब येथे स्थानांतरण, अनुसूचीत जमातीच्या मुलामुलींसाठी वस्तीगृह, घाटंजी येथे क्रिडा संकुल तसेच विवीध सहा ठिकाणी पुल बांधण्यात येणार असल्याचे त्यांनी सांगितले. 

साभार :- देशोन्नती  

कार्यकर्त्यांचे ‘लाड’ पुरवितांना समाजाची ‘चाड’ हवी

बालहट्ट, स्त्री हट्ट व राजहट्ट हे तिन हट्ट पुरविण्यासाठी काहीही करावे लागते असा समज आपल्या समाजात रूळला आहे. किंबहुना तसे ऐतिहासिक संदर्भही आढळतात. गेल्या काही काळात ‘कार्यकर्ता हट्ट’ हा प्रकार राजकीय वर्तुळात ऐकायला येत आहे. कार्यकर्त्यांची मागणी आहे म्हणुन एखादी गोष्ट करावीच लागेल यासाठी एखादा लोकप्रतिनिधी चुकीचे निर्णय घेतो. मात्र त्यानंतर ती गोष्ट जेव्हा उघडकीस येते तेव्हा त्या नेत्यालाच तोंडघशी पडावे लागते. याचे ज्वलंत उदाहरण म्हणजे सोलापुर जिल्ह्यातील दोन आश्रमशाळा कार्यकर्त्याचे लाड पुरविण्यासाठी थेट यवतमाळ जिल्ह्यात हलविण्याचा झालेला प्रयत्न. 

उच्च न्यायालयाच्या निर्णयामुळे या ‘केविलवाण्या’ राजकीय हट्टाला चपराक बसली आहे. राज्याचे सामाजीक न्याय मंत्री ना.शिवाजीराव मोघे यांनी आपल्या लाडक्या कार्यकर्त्यासाठी नियम, कायदा व समाजाप्रती असलेली जबाबदारी बाजुला ठेवुन सोलापुर जिल्ह्यातील अक्कलकोट येथुन पांडूरंग राठोड या संस्थाचालकाच्या दोन आश्रमशाळा आपल्या अधिनस्त अधिका-यांवर दबाव टाकुन बंद करण्याचा निर्णय घेतला. २०१० मध्ये झालेल्या या कार्यवाही नंतर त्या शाळा चक्क केळापुर व घोटी येथे हलविण्याचा निर्णय घेतला. सदर संस्थाचालकाने न्यायालयात दाद मागितल्यावर या गंभिर विषयाला वाचा फुटली. तर न्यायालयाने याप्रकरणी दिलेल्या निर्णयानंतर तर ना. मोघेंचा हा ‘सामाजीक न्याय’ चांगलाच चर्चेत आला आहे. नविन नेतृत्व कार्यकर्त्यांमधुनच निर्माण होत असते. त्यासाठी कार्यकर्त्यांना सक्षम करतांना काही गोष्टी कराव्या लागतात हे सर्वांनाच मान्य आहे. मात्र तसे करतांना कोणाच्या तोंडचा घास हिरावल्या जातोय का? कोणावर अन्याय तर होत नाहीय ना याचा विचार ना. मोघेंसारख्या अनुभवी व जेष्ठ नेत्यांनी करायला हवा असे वाटते. 

सगळ्या गोष्टी पचल्या जाईल असा काळ आता राहिला नाही. एका विशिष्ट मर्यादे पर्यंत त्या लपुन राहतात. मात्र जेव्हा त्याचा अतिरेक होतो तेव्हा कोणत्या ना कोणत्या माध्यमातुन त्या बाहेर येतात अन कालांतराने त्याचा ‘तमाशा’ जनतेसमोर झाल्याशिवाय राहात नाही. कार्यकर्त्यांच्या हट्टामुळे ना. मोघे आजवर अनेकदा अडचणीत आले आहेत. त्यातही मोघेंचे मानसपुत्र म्हणुन वावरणा-या त्यांच्या माजी स्वीय सहाय्यकामुळे तर ते तोंडघशी पडले आहेत.  मात्र बहुदा त्यांना त्याचे शल्य नाही हेच त्यांच्या वागणुकीवरून दिसते. हा त्यांचा व्यक्तीगत प्रश्न असला तरी ते समाजाचे प्रतिनिधीत्व करतात या नात्याने त्यांच्याकडून काही अपेक्षा नाईलाजास्तव का होईना पण ठेवाव्याच लागतात. कोणावर अन्याय न करताही कार्यकर्ते घडविता येतात. यवतमाळ जिल्ह्यातच ना. मोघेंच्या समकालीन असलेले स्व. उत्तमराव पाटील, ना. मनोहर नाईक यांच्या मार्गदर्शनात पुढे आलेले अनेक कार्यकर्ते आज मोठ्या पदावर आहेत. कॉंग्रेसचे प्रदेशाध्यक्ष माणीकराव ठाकरे, विधानसभेचे उपाध्यक्ष वसंतराव पुरके यांची नावे यामध्ये प्रामुख्याने घ्यावी लागेल. त्या तुलनेत गेल्या अनेक वर्षांच्या कालखंडात घाटंजी, पांढरकवडा व आर्णी या भागातून नवे नेतृत्व पुढे आलेले नाही हेच दुर्दैव आहे. मात्र तरी देखिल दरवेळी मंत्रीपद ना. मोघेंच्या वाट्याला येते. त्याचा नेमका किती फायदा या भागातील जनतेला झाला हा भाग अलाहिदा.

मतदार संघातील घाटंजी तालुक्याविषयी ना. मोघेंचा सापत्नभाव नेहमीच सिद्ध झाला आहे. उपविभाग निर्मीतीच्या पार्श्वभूमीवर ही बाब पुन्हा एकदा चर्चेत आली आहे. उपविभागीय कार्यालयाचा दर्जा मिळण्यासाठी घाटंजी सर्व दृष्टीने योग्य असतांनाही मोघेंची नजर आर्णीवरच खिळली आहे. कॉंग्रेसच्या नेतृत्वातील घाटंजी नगर परिषदेने या विरोधात एकमुखी ठराव घेऊन न्यायालयात याचिकाही दाखल केली असल्याने स्वपक्षातच मोघेंना यापुढे विरोधाला सामोरे जावे लागणार आहे. कोणताही निर्णय घेतांना कार्यकर्त्यांच्या हट्टासोबतच ना.मोघेंनी समाजमनाचाही विचार केला तर वेळोवेळी त्यांचेवर नामुष्की ओढवणार नाही.

अमोल राऊत

साभार :- देशोन्नती  

शेतक-यांच्या बांधावर खत वाटप योजनेचा शुभारंभ

थेट शेतीच्या बांधावर खत वाटप करण्याच्या योजनेचा शुभारंभ राज्याचे सामाजीक न्याय मंत्री ना.शिवाजीराव मोघे यांचे हस्ते करण्यात आला. येथिल पंचायत समिती कार्यालयाच्या आवारातून खताच्या पहिल्या वाहनाला त्यांनी हिरवी झेंडी दाखविली. यावेळी जि.प.सदस्य देवानंद पवार, योगेश देशमुख, पं.स.सभापती शैलेश इंगोले, उपसभापती सुवर्णा निकोडे, प्रभारी गटविकास अधिकारी अजय राठोड, तालुका कृषी अधिकारी पी.पी.घुले, पंचायत समितीचे कृषी अधिकारी संजय पवार, कृषी विस्तार अधिकारी राहुल डाखोरे यांचेसह पंचायत समिती सदस्य, अधिकारी व कर्मचारी उपस्थित होते.

थेट शेतक-यांच्या शेताच्या बांधापर्यंत खत पोहचविण्याची ही योजना शेतक-यांच्या फायद्याची असुन त्याचा लाभ घ्यावा असे आवाहन ना.मोघे यांनी यावेळी केले.

गेल्या काही वर्षात खरीप हंगामात खतांची मोठ्या प्रमाणावर मागणी वाढत असल्याने शेतक-यांना खत टंचाईला सामोरे जावे लागत असे. त्यामुळे यावर्षीपासुन शासनाने थेट बांधावर खत वाटप करण्याचा निर्णय घेतला आहे. या उपक्रमांतर्गत जिल्हास्तरावर जिल्हाधिकारी व जिल्हा अधीक्षक कृषी अधिकारी यांच्या अध्यक्षतेखाली खत पुरवठा संनियंत्रण समिती मार्फत खताचा पुरवठा व नियोजन याबाबत आढावा घेण्यात येणार आहे. केंद्र व राज्य पुरस्कृत योजनांतर्गत स्थापन करण्यात आलेल्या शेतकरी गटांच्या माध्यमातून खताचे वितरण होणार आहे.

या योजनेमुळे शेतक-यांना खताच्या टंचाईला सामोरे जावे लागणार नाही असे पंचायत समितीचे कृषी अधिकारी संजय पवार यांनी सांगीतले. 

साभार :- देशोन्नती