महिला वाहक म्हणते, ‘बस मे चढोंगे तो जुते से मारूंगी’

सौजन्याचे धिंडवडे : बिघडलेल्या एस.टी.बसच्या 

प्रवाशांना बसविण्यास नकार

एस.टी.बसमधील वाहकाने प्रवाशांना विनम्र होऊन हात जोडून नमस्कार करावा, स्वत:चे नाव सांगुन त्यांचे स्वागत करावे आणि बस पेâरीबाबत माहिती द्यावी अशा सौजन्यपुर्ण वागणुकीच्या अभियानाला गेल्या एक जानेवारीपासुन सुरूवात झाली. मात्र काल (ता.१७) ला यवतमाळ घाटंजी मार्गावरील प्रवाशांना एका महिला वाहकाने दिलेल्या वागणुकीने हेच का ते एस.टी.चे ‘सौजन्य’ असे म्हणण्याची वेळ आली आहे. त्या महिला वाहकाच्या अपमानास्पद वागणुकीची तक्रार काही प्रवाशांनी घाटंजी बसस्थानकात नोंदविली आहे.

याबाबत माहिती अशी की, काल (ता.१७) ला सकाळी १० वाजेदरम्यान यवतमाळ ते घाटंजी बस क्रं. एम.एच.०७ सी.७७७३ ‘यशवंती’ हि बस यवतमाळ शहरापासुन सुमारे ४ किमी अंतरावर तांत्रिक बिघाडामुळे बंद पडली. या बसमध्ये वाहक नसल्याने चालकाने प्रवाशांनाच यवतमाळ आगारात मोबाईलद्वारे सुचना देण्यास सांगितली. बस बिघडल्यास त्याच मार्गावरील दुस-या एखाद्या बसमध्ये बसण्याची प्रवाशांना मुभा असते. मात्र त्या दरम्यान तिन बस थांबल्या नाही. तब्बल दोन तास ताटकळत बसल्यावर दुपारी १२ च्या दरम्यान एम.एच.०७-९४३७ क्रमांकाची बस प्रवाशांनी प्रयत्न करून थांबविली. मात्र या बसची महिला वाहक प्रवाशांना बसु देण्यास तयार नव्हती. बसचा वाहक सांगत नाही तोवर बसु देणार नाही असे ती म्हणाली. मात्र या बसला वाहक नसतो, हि बस नॉन स्टॉप आहे, आमचेकडे तिकीट आहे ते तपासा व आम्हाला बसु द्या अशी विनंती प्रवाशांनी केली. मात्र त्या महिला वाहकाने प्रवाशांशी हुज्जत घातली. यावर तुमच्या वरिष्ठांना विचारा, आम्ही आगारात फोन केला होता असेही प्रवाशांनी सांगितले. मात्र मला कुणाशीच देणेघेणे नसल्याचे ती म्हणाली. प्रवाशांची बसजवळ गर्दी झाली असता, ‘कोई बस मे चढा तो जुते से मारूंगी’ असे म्हणत तिने दरवाजा लावुन घेतला व बस निघुन गेली. त्यानंतर ब-याच वेळाने प्रवाशी अन्य एका बसने घाटंजीला पोहचले. 

महिला वाहकाच्या या अपमानास्पद वागणुकीची लेखी तक्रार प्रवाशांनी घाटंजी बस स्थानकात केली. तसेच विभाग नियंत्रक व वरिष्ठांकडेही तक्रार करणार असल्याचे प्रविण दोंतुलवार, विवेक गोहाडे, राजु जाधव, तानाजी नैताम, ऊवंâडा मेश्राम, सुनिता जाधव, मिना दोंतुलवार, मिलिंद गजभिये या प्रवाशांनी ‘सकाळ’ ला सांगितले. सदर महिला वाहक नेहमीच प्रवाशांशी उद्धट बोलते व वरिष्ठांनाही जुमानत नाही असेही काही प्रवाशी म्हणाले. एकीकडे एस.टी.महामंडळ सौजन्यपुर्ण सेवेचा गाजावाजा करीत असतांना अशी घटना या अभियानावर प्रश्नचिन्ह निर्माण करणारी आहे. अशा बेलगाम कर्मचा-यांना आधी शिस्तीत आणावे व नंतरच सौजन्याचा विचार करावा असे मत प्रवाशांनी व्यक्त केले. त्या महिला वाहकावर कठोर कार्यवाही करावी अशी मागणीही प्रवाशांनी केली आहे.

साभार : सकाळ 

एस.टी.ने दुचाकीस्वारास चिरडले; १ ठार १ जखमी

घाटंजी - यवतमाळ मार्गावर भिषण अपघात

घाटंजी यवतमाळ मार्गावर सावरगड दर्ग्यापासुन सुमारे १ किलोमीटर अंतरावर एस.टी.बसने दुचाकीस भिषण धडक दिली. या धडकेत घाटंजी येथिल युवकाचा करूण अंत झाला. दुपारी दोन वाजताच्या सुमारास हा भिषण अपघात घडला. या अपघातात विशाल सुभाष दिडशे (२०) हा एस.टी.खाली चिरडल्या गेल्याने जागीच ठार झाला. तर त्याच्या सोबत दुचाकीवर असलेला गौरव सुरेश कुडेगावे (१९) हा जखमी झाला. हा अपघात एवढा भिषण होता की, मृतकाचे डोके फुटून मेंदू बाहेर आला. तर गौरव कुडेगावे हा जखमी आहे. त्याच्यावर यवतमाळ येथिल खासगी रूग्णालयात उपचार सुरू आहे. नेर आगाराची एम.एच.४० ८५९४ क्रमांकाची एस.टी. बस घाटंजी येथुन यवतमाळला जात होती. तर मृतक व जखमी युवक एम.एच.२९ एक्स. ८१३३ या क्रमांकाच्या दुचाकीने यवतमाळहून घाटंजीकडे येत होते.  मृतक विशाल दिडशे हा यवतमाळ येथिल अध्यापक विद्यालयात डि.टी.एड. प्रथम वर्षाला शिकत होता. एस.टी.बसचा चालक हुकरे याला पोलीसांनी अटक केली. या घटनेची माहिती मिळताच घाटंजीतील सराफा मार्केट मधील व्यावसायीकांनी आपापली प्रतिष्ठाने बंद केली. या दु:खद घटनेबद्दल तालुक्यात सर्वत्र हळहळ व्यक्त होत आहे.

साभार :- देशोन्नती  

बेजबाबदार एस.टी. चालक वाहकाची तक्रार

एस.टी.मध्ये प्रवाशांना बसू न देता रिकामी बस यवतमाळकडे नेणा-या चालक वाहकाला प्रवाशांनी जाब विचारला असता त्यांनी गैरवर्तणुक केली अशी तक्रार सामाजीक कार्यकर्ते मधुकर निस्ताने यांनी संबंधीतांकडे केली आहे. घाटंजी बसस्थानकावर दि.२१ मार्चला दुपारी १.३० वाजता यवतमाळ करीता जाणारी सर्वसाधारण बस उभी होती. त्यामध्ये अनेक प्रवासी बसलेले होते. तेवढ्यात त्या बाजुलाच जलद बसही लागली होती. ही बस अगोदर जाणार म्हणुन बहुतांश प्रवाशी साधारण बस मधुन उतरून जलद बसमध्ये जाण्यास निघाले. मात्र अचानकच ती बस सुरू झाली. त्यामध्ये एकही प्रवाशी नव्हता. दुस-या बसमधील प्रवाशी येत असल्याचे दिसुनही चालक व वाहकाने बस थांबविली नाही. महिला व जेष्ठ नागरीक बसमागे धावत होते. एवढ्यात काही लोक बस समोरून आल्याने चालकाला बस थांबवावी लागली. पाहुण्यांना यवतमाळ बस मध्ये रवाना करण्यासाठी आलेल्या निस्ताने यांनी सदर चालक वाहकाला प्रवाशांना बस मध्ये घेण्याची विनंती केली. मात्र ती धुडकावुन चालक दांडगे व वाहक आत्राम यांनी तक्रारकर्त्यालाच शिवीगाळ करणे सुरू केले. तसेच बस मध्ये चढणा-यांना खाली ढकलण्याचाही प्रयत्न केला. यावेळी तणावपुर्ण वातावरण निर्माण झाले होते. चालक वाहकाच्या असभ्य वर्तणुकीची तक्रार विभाग नियंत्रकाकडे करण्यात आली असुन त्यांचेवर कडक कार्यवाही करण्याची मागणी करण्यात आली आहे. बसस्थानकावर असे प्रकार नेहमीचे झाले असुन एस.टी.चे काही चालक वाहक अनेकदा बसस्थानक प्रमुखालाही जुमानत नसल्याचे दिसते. एस.टी. महामंडळ सौजन्यपुर्ण सेवेचा गाजावाजा करीत असले तरी प्रत्यक्षात मात्र प्रवाशांना कर्मचा-यांच्या वागणुकीमुळे अनेकदा अपमानीत व्हावे लागते. बेजबाबदार कर्मचा-यांवर कार्यवाहीच होत नसल्याने अशा प्रकारांमध्ये वाढ झाली असल्याचे निदर्शनास येत आहे.

साभार :- देशोन्नती 

मद्यधुंद एस.टी.चालकामुळे प्रवाशांचा जीव टांगणीला

सुरक्षीत प्रवासाची हमी घेणा-या एस.टी. महामंडळाच्या बसमधील अनेक प्रवाशांचा जीव आज मद्यधुंद चालकामुळे टांगणीला लागला होता. आज सायंकाळी ५.४५ वाजता घाटंजी बसस्थानकावरून घाटंजी ते पांढरकवडा बस क्र.९७४० ही बस निघाली. प्रवासादरम्यान चालकाला बस नियंत्रीत होत नसल्याचे प्रवाशांच्या निदर्शनास आले. अनेकदा त्यांनी वाहकाच्या माध्यमातुन चालकाला याबाबत सुचना केल्या. मात्र चालक मद्यधुंद असल्याने बस अनेकदा रस्त्याच्या खालीही उतरली. या प्रकारामुळे प्रवाशांमध्ये प्रचंड घबराट पसरली. त्यानंतर काही प्रवाशांनी पुढाकार घेत सदर एस.टी.ला साखरा गावाजवळ थांबविले. तसेच घाटंजी बसस्थानक व पांढरकवडा आगाराला या बाबतीत कळविले. माहिती मिळताच पांढरकवडा आगाराचे अधिकारी व कर्मचारी साखरा गावाजवळ अतिरिक्त बस घेऊन आले. प्रवाशांना त्या बसमध्ये रवाना करण्यात आले. मद्यधुंद बसचालक चंदु मडावी याला पुढील कार्यवाहीसाठी घाटंजी येथे आणण्यात येणार असल्याची माहिती आहे. सायंकाळच्या बसफे-यांवरील अनेक चालक वाहक नेहमीच मद्यप्राशन करून असतात अशा प्रवाशांच्या तक्रारी आहेत. एस.टी. महामंडळाच्या अधिका-यांनी याकडे लक्ष द्यावे अशी मागणी होत आहे.


अखेर त्या  महिलेचा मृत्यू
आर्णी तालुक्यातील केळझरा (कृष्णनगर तांडा) येथिल चंदा यादव राठोड या महिलेची काल (दि.१६) ला रात्री मृत्यूशी झुंज देतांना प्राणज्योत मालवली. दि.१४ डिसेंबरला राहत्या घरी जळाल्यानंतर तिचेवर सेवाग्राम येथे उपचार सुरू होते. पत्नीला जाळण्याचा प्रयत्न केल्याप्रकरणी तिचा पती यादव राठोड अटकेत आहे.

साभार:- देशोन्नती