घाटंजीत 'व्यसनमुक्त थर्टीफ़र्स्ट' चा संकल्प

सामाजीक संस्थांचा पुढाकार : मार्गदर्शन कार्यशाळा व प्रचार रॅली

अलीकडच्या काळात पाश्चात्य संस्कृतीचे अनुकरण करून नववर्षाचे स्वागत करण्याची विभत्स प्रथा पडली आहे. नविन पिढीला या पासुन परावृत्त करण्यासाठी तालुक्यातील काही सामाजीक संस्थांनी पुढाकार घेतला असुन व्यसनमुक्त थर्टीफ़र्स्ट साजरा करण्याचा संकल्प घेतला आहे. या अंतर्गत ३१ डिसेंबर रोजी दुपारी १ वाजता दिलासा संस्थेच्या कार्यालयात कार्यशाळा घेण्यात येणार असुन दुपारी साडेचार वाजतापासुन घाटंजी शहरातून पथनाट्यासह जनजागरण रॅली काढण्यात येईल. गिलानी महाविद्यालयापासुन रॅलीला सुरूवात होईल. दरम्यान संपुर्ण शहरात या माध्यमातून जनजागरण करण्यात येईल. 

अनेक युवक नवर्षाच्या स्वागताच्या निमित्ताने मद्यपान करतात. त्यामुळे अनेकांना त्याचे व्यसन लागते. अनेक युवक दारू पिऊन या दिवशी शहरातील रस्त्यांवरून भरधाव वेगाने वाहने चालवितात. त्यामुळे सर्वसामान्यांना त्याचा प्रचंड त्रास होतो. 

युवकांमध्ये याबाबत जाणिव निर्माण होऊन युवाशक्तीचा योग्य उपयोग व्हावा या उद्देशाने प्राऊटिस्ट ब्लॉक, दिलासा सामाजीक संस्था, विकासगंगा संस्था, स्वरजिवन संस्था, प्रियदर्शीनी संस्था, प्रदिप बहुउद्देशीय शिक्षण प्रसारक मंडळ या संस्थांनी व्यसनमुक्त थर्टीफ़र्स्ट कार्यक्रमाचे आयोजन केले आहे. तालुक्यातील युवकांनी या कार्यक्रमांमध्ये मोठ्या संख्येने सहभागी व्हावे असे आवाहन आयोजकांनी केले आहे.

केशटोभाऊ पाठोपाठ अंजुबाईचेही लागले शुभेच्छा फलक

सरत्या वर्षाच्या शेवटच्या दिवशी कुतूहल व चर्चेचा विषय ठरलेल्या केशटोभाऊंच्या शुभेच्छा फलकांपाठोपाठ काल त्या फलकाला न्याहाळणारी अंजुबाई ही मनोरूग्ण महिलाही फलकावर झळकली. काही हौशी तरूणांनी तिच्याही छायाचित्रासह शुभेच्छा फलक शहरात लावले आहेत. काल पोलीस स्टेशनसमोर लागलेल्या फलकाला अंजुबाई ही वेडसर महिला मोठ्या कुतूहलाने न्याहाळत होती. आपल्यातीलच एक आज चक्क फलकावर झळकल्याने तिला त्याचे नवल वाटले होते. अखेर आज तिच्याही नावाचे शुभेच्छा फलक लागल्याने ती सुद्धा प्रसिद्धीच्या झोतात आली आहे.

या उपक्रमामुळे अशा प्रसंगी भुछत्राप्रमाणे उगवणा-या कार्यकर्त्यांचे होर्डींग्स मात्र नजरेस पडले नाहीत. एरवी घाटंजी शहरात शुभेच्छा फलकांचा सुकाळ असतो. मात्र यावेळी केशटोभाऊ व अंजुबाई यांच्या भीतीमुळे केवळ फलकावर चमकणा-या बेगडी नेते व कार्यकर्त्यांची फलक लावण्याची हिंमतच झाली नाही. समाजात मानाचे स्थान असणा-यांचे लागणारे होर्डींग्स ही समजण्यासारखी गोष्ट आहे. मात्र ज्याच्याकडे कोणते पद नाही व समाजात पतही नाही असे लोकही स्वत:चा गवगवा करण्यासाठी होर्डींगबाजी करतात.

घाटंजी शहरातील मुख्य रस्त्याच्या मधोमध असलेल्या पथदिव्यांच्या खांबांवर मोठमोठे होर्डींग्स लावण्याचा प्रकार गेल्या काही वर्षांपासुन बिनदिक्कतपणे सुरू आहे. या फलकांचा आकार एवढा मोठा असतो की, अनेकदा वाहनधारक त्याला जाऊन धडकतात. त्यामुळे अपघात होऊन नागरिक जखमी सुद्धा झाले आहेत. मात्र या बाबीकडे नगर परिषद व पोलीस यंत्रणा सपशेल दुर्लक्ष करीत असल्याने काही युवकांनी पुढे येऊन हा गांधीगीरीचा मार्ग अवलंबिला. त्याचा चांगलाच परिणाम नववर्षाच्या दिवशी दिसुन आला. काही सन्माननिय अपवाद वगळता शुभेच्छा फलक निदर्शनास आले नाही. हा बदल नेमका किती दिवस राहणार हे पाहणे महत्वाचे ठरणार आहे.

केशटोभाऊंच्या शुभेच्छांनी होर्डींगबाजांना चपराक

मिश्कील शुभेच्छा फलकांची घाटंजीत चर्चा 

अरेच्चा आता हा कोण नविन नेता तयार झाला ? हा तर गावभर सर्वांना शिव्या देत फिरणारा केशटो. याच्याही नावाचे होर्डींग ? ही तर कमालच झाली. आजकाल मोठ्या फलकावर फोटो व नाव आले की तो नेता होऊन जातो. ज्याच्या मागे चार कार्यकर्ते नाहीत त्या नेत्याच्या वाढदिवशी मोठमोठे शुभेच्छा फलक लागतात. मग बिचारे केशटोभाऊ का प्रसिद्ध होऊ नये? त्यांच्याही नावाचे होर्डींग्स का लागू नये? अशा मिश्कील खुसखुशीत चर्चांनी आज घाटंजीकरांची सकाळ सुरू झाली. याला कारण ठरले मानसिक संतुलन बिघडल्याने शहरात शिव्या देत फिरणा-या केशटो नामक ईसमाच्या नावाने सगळीकडे लावण्यात आलेल्या नविन वर्षाच्या शुभेच्छा फलकांचे. घाटंजीतील पोलीस स्टेशन चौक, सिनेमा टॉकीज चौक, शिवाजी चौक तसेच ईतर भागातही हे फलक लावण्यात आल्याने रस्त्यावरून ये-जा करणारा प्रत्येकजण त्याकडे कुतूहलाने पाहत असल्याचे चित्र सर्वत्र दिसत होते. एक वेडसर महिला तर पोलीस स्टेशन चौकात हे फलक न्याहाळत बराच वेळ उभी होती. आपल्या सोबत फिरणारा केशटो आज ईथे कसा याचे तिला मोठे नवल वाटले. गेल्या दोन तिन वर्षांपासून घाटंजी शहरात कोणत्याही निमित्याने होर्डींग्स लावण्याचे फॅडच झाले आहे. एका माजी नगरसेवकाचा तर अशा होर्डींग्सबाजीत हातखंडा आहे. त्याचा स्वत:चा वाढदिवस असो वा त्याच्या सर्वोच्च नेत्याचा, शहरात सर्वत्र फलक लावण्यात येतात. काही वर्षापुर्वी तर त्याने रस्त्याच्या मधोमध पथदिव्याच्या खांबावर लावलेल्या होर्डींग्सवर रोषणाई करण्यासाठी बेकायदेशीरपणे चक्क पथदिव्यांच्या कनेक्शन मधुनच विज पुरवठा घेतला होता. सद्यस्थितीत काही राजकीय पक्षांकडे कार्यकर्त्यांची कमतरता असल्यामुळे हवसे गवसेही फलकावर झळकतात. अशांना केशटोभाऊंच्या शुभेच्छांमुळे आता थोडा विचार करावा लागणार आहे. अशी विबंडनात्मक फलके लावण्याचा पहिला प्रयोग औरंगाबाद शहरात झाला. त्यानंतर यवतमाळकरांनी उपरोधीकपणे टॉमीच्या वाढदिवसाला असे शुभेच्छा फलक लावले होते. त्यावेळी माध्यमांनी याची प्रकर्षाने दखल घेतली होती. आता घाटंजीकरांनी आपल्या विनोदबुद्धीतून एक वेगळा संदेश जगापुढे ठेवला आहे. मोठमोठ्या होर्डींग्समुळे शहराच्या होणा-या विद्रुपीकरणाला यामुळे आळा बसेल अशी अपेक्षा नागरिक व्यक्त करीत आहेत. काहीही असले तरी नववर्षाच्या स्वागतासाठी सज्ज झालेल्या घाटंजीकरांना चर्चेसाठी एक खमंग विषय मिळाला हे निश्चित.